തന്റെ പരിശുദ്ധ ഭാര്യയെ സംശയിച്ചപ്പോഴും ഹേറോദേസില്നിന്നു രക്ഷപ്പെടാന് ഈജിപ്തിലേയ്ക്ക് പലായനം ചെയ്തപ്പോഴും അവിടെ നിന്ന് നസറത്തിലേയ്ക്ക് മടങ്ങേണ്ട ഘട്ടം വന്നപ്പോഴും ഒരു മാലാഖ വഴി യൗസപ്പിനു സന്ദേശം ലഭിക്കുകയാണുണ്ടായത്. ആ സന്ദേശങ്ങള് അത്ര മാധുര്യമുള്ളവയൊന്നുമല്ലായിരുന്നുവെങ്കിലും പൂര്ണ്ണസന്തോഷത്തോടെ അദ്ദേഹം അവ നിര്വ്വഹിച്ചുകൊണ്ട് താന് നീതിമാനാണെന്ന് പരിശുദ്ധാത്മാവിന്റെ സാക്ഷ്യത്തിന് തെളിവ് നല്കിയിരിക്കുന്നു.
ശിശുവായ ഈശോയുടെ ദരിദ്രജനനത്തിലും ഈജിപ്തിലേയ്ക്കുള്ള പലായനത്തിലും പന്ത്രണ്ടു വയസ്സുള്ളപ്പോള് ഈശോയെ കാണാതായതിലും യൗസേപ്പ് അനുഭവിച്ച മനോവേദന പ്രയോജനപൂര്വ്വം നമുക്ക് ധ്യാനിക്കാവുന്നതാണ്. ഈശോയെ കാണുകയും കേള്ക്കുകയും മാത്രമല്ല സ്വകരങ്ങളില് സംവഹിക്കുകയും ആശ്ലേഷിക്കുകയും അവസാനം അവിടുത്തേയും പരിശുദ്ധ ജനനിയുടേയും സ്നേഹശുശ്രൂഷകള് സ്വീകരിച്ച് മരിക്കുകയും ചെയ്തത് എത്ര മഹാഭാഗ്യം! യൗസേപ്പ് നന്മരണ മധ്യസ്ഥനും കന്യകകളുടെ കാവല്ക്കാരനും തൊഴിലാളികളുടെ ആശ്രയവും തിരുസഭയുടെ സംരക്ഷകനുമാണ്. ഈശോയ്ക്ക് 15 വയസ്സുള്ളപ്പോള് യൗസേപ്പു മരിച്ചുവെന്നാണ് ഊഹിക്കുന്നത്.
ഈജിപ്തില് പഞ്ഞമുണ്ടായപ്പോള് ഫറവോന് രാജാവ് പ്രജകളോട് പറഞ്ഞു “യൗസേപ്പിന്റെ പക്കല് പോകുവിന്.” ഇന്നത്തെ ആത്മീയ പഞ്ഞത്തിലും മറ്റ് അവശതകളിലും നമുക്ക് ആശ്രയിക്കാവുന്നത് വി. യൗസേപ്പിനെയാണ്. ആവിലായിലെ വി. ത്രേസ്യ പറയുന്നു “മഹാനായ വി. യൗസേപ്പിനെ എന്റെ മധ്യസ്ഥനായി ഞാന് തെരഞ്ഞെടുത്തു. അദ്ദേഹത്തിന്റ മാധ്യസ്ഥത്തിന് ഞാന് എന്നെതന്നെ എല്ലാക്കാര്യങ്ങളിലും സമര്പ്പിക്കുന്നു. ഞാന് ചോദിച്ചിട്ടുള്ള യാതൊന്നും ലഭിക്കാത്തതായി ഓര്മ്മിക്കുന്നില്ല. യൗസേപ്പിന്റെ സഹായം അപേക്ഷിച്ച യാതൊരുത്തനും പുണ്യത്തില് അഭിവൃദ്ധിപ്പെടാത്തതായി ഞാന് കേട്ടിട്ടില്ല.” തന്നോടു പ്രാര്ത്ഥിക്കുന്നവരെയെല്ലാം അദ്ദേഹം അത്ഭുതകരമാംവിധം സഹായിക്കുന്നു. ആകയാല് പ്രതീക്ഷാപൂര്വ്വകമായ സന്തോഷത്തോടെ യൗസേപ്പിതാവിന്റെ തിരുനാള് കൊണ്ടാടാം.
ചില വിശുദ്ധര് ചില ആവശ്യങ്ങളില് പ്രത്യേക കാര്യക്ഷമതയോടെ നമ്മെ സഹായിക്കുന്നു. നമ്മുടെ പരിശുദ്ധ മധ്യസ്ഥനായ വി. യൗസേപ്പ് എല്ലാകാര്യങ്ങളിലും എല്ലാ ആവശ്യങ്ങളിലും എല്ലാ ഉദ്യമങ്ങളിലും നമ്മെ സഹായിക്കുന്നു.
.jpg)
Post A Comment:
0 comments: